30. mars 2009

Fés og fararheill og flottur fyrirlestur.

Kl. 6 í morgun ákvað ég að nýta morgunsárið til að taka niður þvott og brjóta saman. Árrisul húsfreyja getur komið ýmsu í verk, skal ég segja ykkur. En ekki tókst betur til en svo að ég hrasaði um (tæknilega gallaðan og asnalegan) þröskuldinn á leiðinni þvottahús-eldhús. Verandi með fullt fangið af þvotti datt ég á andlitið, sem betur fer vinstri vangann. Þetta var helvíti vont og ég er fyrst núna, um kvöldið, að fá tilfinningu í tennur og varir - hefur liðið eins og ég kæmi koldofin frá tannlækni í allan dag. Svo verður spennandi að sjá hversu gul, blá og marin ég verð og hvað geta spunnist skemmtilegar kjaftasögur út frá því! (Ekki er til bóta að ég er að kenna unglingunum Grafarþögn … hvar kona er barin eins og harðfiskur og ber þess merki.)

(Ég er búin að detta beint á hnakkann, á bílastæði skólans, aftur fyrir mig á olnbogann um miðja nótt hérna heima - hann bólgnaði ansi mikið og a.m.k. þrisvar í stiganum í skólanum. Er orðin leið á dettiæfingum!)

Svo vil ég vekja athygli á frábærum fyrirlestri, Endurtekin stef um ofsa, óhóf og ágirnd, sem Guðrún Nordal flytur í vefvörpun HÍ.  Þetta eru um tugur stuttra fyrirlestra (yfirleitt 10 mín - korter), ég hef ekki horft /hlustað á þá alla en af þeim sem ég hef skoðað er hennar langbestur, flutningur yfirlætislaus en örlítil svipbrigði og tónfall gerði hann hæfilega lifandi í þessu litla rými. Allir sem hafa áhuga á Sturlungu, Njálu og útrásarvíkingum ættu að geta fundið þar eitthvað við sitt hæfi  

Öll fyrirlestrarrunan er á http://www.hi.is/is/mannlif_og_kreppur

4 ummæli við “Fés og fararheill og flottur fyrirlestur.”

  1. Einar ritar:

    Hvað sagði ég, þér hefnist fyrir að hætta á feisbúkk

  2. guðrún ritar:

    Einar viltu vera góður við stóru systur þína

  3. freyja systir ritar:

    Ferlega eitthvað 1970 að vera með þröskulda. Af hverju eruð þið með það? Þú ættir kannski að ganga um með einhvers konar veltigrind (svipað og traktorar voru með í sveitinni í gamla daga) fyrst þú ert alltaf að detta?

  4. Harpa ritar:

    Hm … mig grunaði sjálfa að Feisbúkk væri af hinu illa og sleppti ekki takinu af manni frekar en tröllin í Ólafsfjarðarmúla!

    Einar: Ég hef a.m.k. 4 myndir af þér klæddum í kjól! Þú ert greinilega barnið í mömmuleiknum ;)

    Já, til hvers eru þröskuldar?

    Ég hugsa með hryllingi til líkamsræktartíma á eftir, hvar ég er lélegust þótt ég sé í lagi, en núna treysti ég mér ekki í hopp á öðrum fæti, þekkja sundur hægri og vinstri og ég með sundl og suð í eyra og ógislega illt í kinninni! Svei mér ef ég sleppi ekki bara þessum tíma (er reyndar farin að skrópa ansi mikið) og fer yfir ritgerðir barnanna í staðinn. (Verk sem ég hugsa einnig til með hryllingi!)